ACT投射遊戲 體驗~

因為佢嘅嶄新慨念、因為佢嘅難以掌握,因為佢嘅高深莫測,令我一見到佢就著迷………… 一個幫我打開人生另一新角度嘅 Clinical Psychology Therapy (臨床心理學療法),ACT (Acceptance and Commitment Therapy)!!

ACT 最有趣嘅地方係 將我地東方自古至今嘅坐蟬 (Meditation) 練習固體化,同學術化。唔好睇小 Meditation,西方已經有數以千萬大大小小嘅科學同學術研究証實,佢對我地人腦嘅功能發展同改善有極大嘅幫助,Meditation 嘅威力真係唔可以睇少。 (詳情日後再同大家慢慢分享~)

Joanthan 响 TED Talk 度帶出嘅 “我有個諗法………” 嘅練習只係 ACT 裏面其中一個比較容易掌握嘅練習。佢主要係幫我地練習冇咁易沉溺响自己嘅 Thoughts (思想) 之中,冇咁易被我地嘅”思想”牽住自己走。同 Meditation 嘅功效差唔多。(係~ 東方嘅千年大智慧,Meditation,我要去到外國,由外國新文化話番畀我知,我先知到佢嘅偉大同威力. . . . . . . . . )

我最近最深嘅體驗係,ACT裏面嘅情感投射練習。大至上係將內心嘅感覺,形象化咁投射响自己眼前。佢可以令我地盡情咁去觀察自己嘅感覺,同深深去感受佢 (點解要深深感受佢?)。每個人用嘅形象化方式都唔同,而我個人投射出黎嘅影像,全部都係小朋友,只係表情同動作唔同。有時係瞓咗响地下不停扭計嘅小朋友、有時係嬲爆爆頭上著火嘅,有時係手指指破口大罵嘅、有時係震騰騰呢埋一邊嘅、有時係靜嚶嚶縮埋一舊响度喊嘅……… 。

所有ACT 嘅練習同 Meditation 或者 Mindfulness 一樣,重點係 零批評咁觀察自己嘅 Thoughts 或者自己嘅感受。而當我平靜咁觀察自己投射出黎嘅影像嘅時候,感覺真係好舒服……… 有一種無拘無束嘅 peaceful (平靜) 感覺。可能係因為練習之中,自我接納同自我包容嘅彈性慢慢變得大住好多,而且投射練習對我黎講有一種盡情釋放嘅感覺。

其實開頭未用小朋友做投射影像嘅時係,我嘅投射練習對我黎講係冇乜效同冇乜感覺,所以搵到啱自己嘅投射影像應該都幾重要。如果你覺得好嬲、唔開心、抑鬱,甚至任何情緒,不況試下玩玩呢個情感投射遊戲吖~

希望我嘅體驗可以幫到你地其中一位~

Leave a Reply

Your email address will not be published. Required fields are marked *