身體力行 表達嘅……愛~

當我地用時間,身體力行咁為對方做一啲嘢,對方會感覺到好被愛嘅話,呢種就係 The 5 Love Languages 裏面嘅最後一種語言,Acts of service (幫忙協助)。對小朋友嘅話,為佢地做嘢同服侍佢地,响小朋友出世嗰日開始,每位家長都已經開始做梗。因為如果我地唔幫佢地做一啲佢地做唔到嘅嘢嘅時候,佢地係會生存唔到落去。响嬰兒期餵佢地食嘢就係其中一個最明顯嘅例子。

到小朋友一路路大,我地就慢慢會將 Acts of Service 嘅服侍模式,轉為 Acts of Service 嘅協助模式。協助嘅核心係教授,為求小朋友將來可以獨立自主咁生活。教佢地所有自理方法同家務可以幫佢地建立獨立能力。而訓練佢地嘅自我決策能力亦係建立自主嘅好方法。

當然教嘅嘢嘅先後次序係要跟據小朋友嘅學習能力而定。例如 Dr. Chapman 指出 6歲嘅小朋友已經可以自己執床,如果我地教佢地嘅話。無可否認,好多時直接幫小朋友做完件事,會比教佢地做相對快得多,而即時嘅成果亦會好得多。所以好多家長都寧願自己做晒,直至發覺小朋友大咗之後乜都唔願做同唔識做。其實只要畀多啲鼓勵同欣賞多啲小朋友嘅付出,佢地會好樂意享受自己响屋企裏面有貢獻同被欣賞嘅感覺。當然我地包容到小朋友响學習過程中嘅唔完美表現係關鍵之一。

而訓練決策能力,可以由畀多啲選擇佢地去決定開始。例如「你每日可以飲一支XX,你想朝頭早飲定晏晝飲吖?」。不過要記住畀小朋友嘅要係真正嘅選擇空間,唔係一個心目中已經有特定答案嘅問題。如果唔係就只會訓練小朋友去估你心裏面嘅答案,而唔係訓練佢地自己嘅選擇能力。希望每位小朋友都可以感受到父母 Acts of service 嘅嗰份愛~

資料來源:Gary Chapman – The Five Love Languages of Your Children (35:23 – 41:35)

One thought on “身體力行 表達嘅……愛~”

Leave a Reply

Your email address will not be published. Required fields are marked *