禮物背後嘅……愛~

今次到 The 5 Love Languages 裏面嘅第四種語言,Gifts (禮物) 。禮物唔一定要係貴,重點係背後嗰份心意。心意可以話係份禮物嘅靈魂。禮物嘅意義係 “佢諗起我,所以佢帶咗呢樣嘢畀我”。Primary Love Lauguage (主要情感語言) 係 Gifts 嘅人,可以記得邊份禮物、邊個、响邊日送畀佢地。

不過就算我地嘅小朋友嘅 Primary Love Lauguage  係 Gifts 都好,並唔代表我地買畀佢地嘅所有嘢,對佢地都有 Emotional Effect (心靈功效)。換句話講,即係唔代表我地買嘢畀佢地,佢地心靈上就一定感受到愛。因為好在乎小朋友當唔當嗰樣嘢係禮物。例如文具同衫,佢地好可能睇成係生活必需品,或者理所當然有嘅嘢。如果想小朋友感受到類似嘅嘢背後個份愛,可以將份嘢包成禮物,隆重其事咁送畀佢地。

不過要有心理準備,因為 Primary Love Lauguage  係 Gifts 嘅人,可以一世都唔願意揼任何一份佢地收過嘅禮物。所以對一般香港人黎講,樣樣都降重其事咁送畀小朋友,可以會做成存放空間嘅問題。愛當然建議係越多越好,不過我地可能要响令小朋友感受到愛,同存放空間上面做個平衡。或者諗啲聰明啲嘅禮物,例如選擇啲體積較小,或者可以間唔中選擇一啲留唔得耐嘅禮物。

另外 Gary 講到,如果我地買畀小朋友嘅嘢係有付帶條件嘅話,嚴格上黎講嗰份唔稱得上係一份禮物,因為嗰份只係條件交換嘅酬勞。所以唔鼓勵將小朋友嘅動力建基响物質之上。禮物本身係應該純粹出自愛,唔應該同任何嘢掛勾,一掛勾咗就已經唔算得上係禮物。掛勾嘅例子有「你執乾淨間房我先買畀你」、「如果你考試有XX分我就買畀你」、「如果你聽話,你就可以有……」等等。呢啲全部都係將送畀小朋友嘅嘢,變成滿足家長之後所得嘅酬勞。

咁當然我地仍然有買乜、唔買乜畀小朋友嘅選擇權,尤其係响呢個物質咁豐盛嘅世界,其他小朋友有嘅嘢唔代表佢地就需要有。對Primary Love Lauguage 係 Gifts 嘅小朋友黎講,重點唔係份禮物係啲乜,重點係份禮物係邊個送,同對佢地黎講嗰一份愛。

資料來源:Gary Chapman – The Five Love Languages of Your Children (28:50 – 35:23)

One thought on “禮物背後嘅……愛~”

Leave a Reply

Your email address will not be published. Required fields are marked *