我嘅 Good Bad Day~

之前連續9日完全冇出過街,9日裏面出到8個Post連圖,其實真係好開心。每日都盡量12點前瞓,好多時都可以8點前自然醒。要維持到夠精神先可以發揮到高效率嘅製作產量 。因為過程包括:搵主題、搜集資料、mark notes、翻譯、分析、起草稿、邊打入電腦邊改,然後構圖起畫稿、畫入電腦、Check多次錯別字,再放上網,盡量都想趕得切一日一篇。

其實開始進入高效率嘅製作狀態幾日之後,有日就因為某啲原因晏咗瞓,搞到第二日9點幾先識醒。仲要起咗身之後都好冇精神,試咗好多次都集中唔到精神,啲Research資料完全入唔到腦,其他嘢更加唔駛講。嗰一下真係有世界末日嘅感覺。心諗 “啱啱先開始到高效率嘅產量,就咁就因為一晚冇咗~”。腦裏面放棄嘅諗法接二連三,成個人冇晒動力。

打算放棄嗰一日之際,腦裏面就飄過Good Bad Day 呢個idea。橫點我都打算放棄今日嘅時間,咁不如我慢慢準備定聽日要寫嘅嘢,就算唔多都好過冇吖。而當我一放慢腳步,個人一放鬆,動力同靈感就返番晒黎。再加上我畀自己瞓咗幾個字晏覺,精神又再可以高度集中番。結果最後我都可以响當日出到一篇完整嘅小文章。雖然冇圖,但响咁差嘅狀態之下都完成到一篇唔錯嘅小文章,嗰份滿足感真係比完美開始嘅一日仲要大得多。

嗰日係我第一次高度體驗到Good Bad Day嘅威力。佢唔指可以令我放輕番已經改變唔到嘅嘢,仲可以令我珍惜番目前我仍然可以做到嘅嘢,珍惜番任何時間都屬於我嘅選擇權。更可以令我嘅動力繼續延續到下一日。因為如果標籤咗今日嘅失敗,已經係將聽日嘅動力大把折扣。

希望我嘅體驗可以幫到大家~ 更希望Good Bad Day 嘅個idea 可以帶畀大家冇限嘅 Good Days~~

原文:完美嘅一日,都可以由唔完美開始~

2 thoughts on “我嘅 Good Bad Day~”

Leave a Reply

Your email address will not be published. Required fields are marked *