愛自己嘅一切就等於冇改進空間嘛?

愛自己同包容自己嘅一切唔代表唔可以,或者唔會去改變自己。相反,改變之後可以更愛自己。當你想像一個更好嘅自己,响住想像嘅目標去改變時,比起你因為討厭自己而去改變,兩者所帶畀你嘅心情同感覺,會有幾遠吖?你想像得到、感覺得到嘛?其實……正面嘅動力往往比負面嘅動力黎得強大,而且持久。

身邊有一位好朋友,佢因為某啲事嘅發生,令佢覺得自己唔可以再咁細路女性格。佢好唔鍾意自己嘅性格,所以好努力咁去改,由內而外去改。短短兩年嘅時間,佢無論諗嘢嘅方式定處事嘅態度,連我都覺得佢成熟到好吸引,完全係旁若兩人。不過冇幾耐就發現,佢特別討厭細路女性格嘅女仔。因為……類似嘅女仔令佢諗返起以前嘅佢,一個佢接受唔到嘅佢。而且,每當有人令佢覺得,定係佢自己察覺到自己有些微細路女嘅諗法,佢都痛不欲生。

你想像同感受得到面對唔到過去嘅自己,內心有幾痛苦嘛?我相信我嘅好朋友只係其中一個。負面動力帶畀我地嘅副作用,真係唔可以忽略。相反,如果你愛自己,接受到呢一刻嘅自己,再繼續咁去改善嘅話,你唔單止冇討厭自己過去或類似性格嘅人嘅痛苦,而且你可以更加明白類似性格嘅人嘅感受同諗法,從而可以幫到更多嘅人。

(何況女士們,跟據一位美容界嘅朋友指出,大部分嘅負面情緒都會減低身體本身嘅抗衰老效能。值得你地諗諗咖 ^.~)

One thought on “愛自己嘅一切就等於冇改進空間嘛?”

Leave a Reply

Your email address will not be published. Required fields are marked *