「左耳入右耳出」神功!!好嘢黎咖~

一般阿媽話啲仔女左耳入右耳出嗰啲係同我想講嘅神功唔同嘅,所以唔好以為你個仔已經係「左耳入右耳出」神功嘅神級。不過都唔好睇少佢地,佢地嗰啲其實叫「乜都聽唔到」神功,跟本就冇入過耳,都好強下咖。而以下呢句就係「左耳入右耳出」神功嘅精髓嘞:

“No one can make you feel inferior without your consent.” – Eleanor Roosevelt.

意思係,响冇你自己嘅同意之下,冇人可以令到你覺得自己低微。

點解嘅?唔係因為我地唔同意人地嘅批評我地先會咁反感咩? 呢個講法啱咗一半,而另一半响心理學嘅角度黎講就正正相反。

前一半係人地對你嘅批評,同你嘅自我價值觀有出入,所以你覺得唔同意。但當我地開始驚人地對我地嘅批評係真,令到自己有比下去嘅感覺嘅時候,我地內心會作出反擊去鞏固番我地原先嘅自我價值,被開嗰種自我不足嘅感覺。成個過程一般需時少於一秒。換句話講,如果我地唔會因為人地嘅批評而影響到自己嘅自我價值觀嘅話,咁我地就冇需要去反擊嘞。試下睇下以下嘅解說:

對於人地嘅批評唔係100%唔同意  ➡️自我價值觀動搖

↪️你有另百分比係同意人地嘅批評  ➡️自我感覺變得低微

↪️                                      冇你嘅同意  ➡️冇人可以令你覺得自己低微

 

👀【想象體驗】:盡量以五感觀驅全嘅幻想力去想象一下以下嘅情況正在發生,然後感受下你自己有乜感覺。記住要對自己誠實吖~

〖例子一〗:有一個啱啱學識講嘢嘅小朋友用啲仲未發得正嘅音,無端端同你講:「你傻咖?」。
〖例子二〗:有一個成年人,無端端同你講:「你傻咖?」。
〖例子三〗:有一個成年人,指住你,對住另一個人講:「佢連1至10都數唔出咖~」。

〖例子四〗:有一個成年人,指住你,對住另一個人講:「佢數口好差咖~」(或者「佢英文好差咖」)

*希望我以上嘅例子可以令到大家感受到自我價值被動搖同絲毫冇被影響嘅分別啦~

💪【神功修煉】:點樣可以冇咁容易卑人影響到自我價值觀?最首要係唔怕人地點睇自己。要完全做得到唔怕人地點睇你,強化自我價值觀同將自我理想價值觀拉返近現實少少係唔少得嘅。大家要努力呀~~^^~

*如果例子一或例子三都會令你有某啲嘅負面情緒或感覺嘅話都唔駛太擔心,响大部分東亞地區嘅傳統育兒方式嘅成長之下,有咁嘅結果都應該幾普遍嘅。你只要相信靠自己嘅努力就會搵到你自己鍾意嘅自己就得咖嘞,加油吖!!

Leave a Reply

Your email address will not be published. Required fields are marked *