我嘅 記憶小訓練~

我擁有失憶家族嘅基因,雖然我已經係屋企裏面失憶排名榜包尾嗰個。而講起細個要背書嗰時,真係…………唉~。不過真係超感激呢個世界有一樣嘢叫做…………理科!!因為佢我中學先可以畢到業咋。佢可以話救咗我嘅一生~

其實好幾年前已經聽過有記懂技巧之類嘅嘢,不過一直都冇扚起心肝去了解下,直至到我見到 Idriz Zogaj 嘅 TED Talk,先令我有茅塞頓開嘅感覺。所以我決定用我最弱嘅嘢黎練習,就係…記名!書名加作者名!

我覺得 Idriz 嘅記憶技巧裏面,重點係腦裏面嘅”圖像”同”荒謬絕倫”嘅故事。我發覺我諗嘅故仔越搞笑,我就記得越快同越深刻。所以想像力都係好關鍵,因為有趣嘅嘢,個腦先會記得深。有時傻到諗故事諗到自己响度笑………原來背嘢都可以好enjoy~

我嘅練習係,用一幅圖,甚至一個細嘅故仔去演繹我想記嘅書名,而作者名都係一樣。然後再用一個故仔將佢地拉埋一齊。如果我想記埋書裏面嘅幾個重點,我都係用相同嘅方法去記,每個重點一幅圖,再加故事連埋佢地。聽落好似好複雜同好慢,不過唔係練習咗好多次,都開始感覺到記嘢嘅速度可以慢慢變快。而最開心嘅係,一响記唔到名嘅我 (真係嗰頭記完嗰頭又唔記得嗰隻),宜家可以記到嘞。仲要係隔咗好耐都仲有印象,所以真係好開心。所以我會keep住練習,令我嘅記憶技巧可以變得更加快同更加有效。我宜家每一日都會最少記一set書名+作者名,同兩個外語生字。

就算你地係讀梗書、做梗嘢定冇嘢做都好,希望 Idriz 嘅記憶訓練技巧可以幫到你地每一位~

原文:趣味記憶小訓練~

Leave a Reply

Your email address will not be published. Required fields are marked *