將懲罰包裝成愛~

愛,係世界上最大嘅動力。愛,亦都係世界上最Powerful (大力量) 嘅嘢。愛,更加係每個人响成長階段裏面最需要嘅。想小朋友願意多啲同身邊嘅人合作?想小朋友接受自己嘅錯?同想小朋友樂意改善自己?不妨可以試下將懲罰包裝成愛

將懲罰包裝成愛嘅例子

屋企規矩:1) 如果响屋企裏面玩波,波就要鎖起兩日冇得玩。

2) 如果打爛咗屋企嘢,就要用零用錢賠返。

發生事件:小朋友有日响屋企裏面玩波,仲打爛咗個杯。

爸爸講:「聽住~ 我好以你為榮,因為呢啲事好少發生。但你知道屋企嘅規矩咖啦~ 個波我要鎖起兩日。而個杯會响你零用錢度扣。不過你要記住,我以你為榮,因為呢啲事好少發生。」

小朋友多數會覺得自己係抵罰同樂意下次再做好啲。因為佢地知道佢地付出咗嘅努力,爹啲媽咪係見到嘅。

如果相反,家長只係鬧佢地、沒收個波同扣佢地零用錢,小朋友嗰腦裏面只會諗:“我以前一直都好努力去遵守咖,只係今次一次之嘛~” 佢未必覺得自己抵罰之餘,仲好大機會會埋怨爹啲媽咪嘅做法同屋企嘅規矩。

其實好多時家長懲罰小朋友都唔係想令佢地感覺到被傷害,只係想教好佢地。直接畀小朋友感受到背後嗰份愛,黎得更簡單、更直接同可以更有效。愛、關懷同包容都係每個人所需要嘅嘢。如果小朋友响屋企裏面感受唔到愛,到大少少,佢地嘅內心就會驅使佢地出去搵內心一直缺乏嘅愛。而好多問題,就會因為咁樣而產生。問題源頭好多時唔係因為爹啲媽咪唔愛佢地,只係佢地感受唔到愛。所以知道小朋友嘅 Primary Love Language (主要情感語言) ,同不停用佢地嘅 Love Language 去令佢地感受到愛、不停打爆佢地嘅 Emotional Love Tank (情感愛池) 係好最要~ [The Five Love Languages (5種情感語言)]

資料來源:Gary Chapman – The Five Love Languages of Your Children

Leave a Reply

Your email address will not be published. Required fields are marked *